Zinare Part 1 Complete Hausa Novel

Page 17

NAILA;
Hannunta yana rawa ta janyo wayarta, zaman hular kanta ta gyara saboda video call ne. Sai da ta É“ata fuska sannan ta É—aga..

fuskar Sulaim ce ta bayyana yana kwance. Murya ciki-ciki Naila ta ce;

"Barka da dare"

Sulaim bai amsa mata ba ya ce;
"Kin jini shiru ko, aiki ne ya riƙeni ina fatan kina lafiya"

Sai da Naila ta marairaice fuskarta sannan ta ce;
"Nasan babu wani aikin da ya yi maka yawa kawai kaƙi ɗaga kirana ne, saboda munje Makaranta tare Simbi, ban san maiyasa kake son shafamin baƙin jini ba, bayan kai kullum kana tare da Yayanta"

A É“angaren Sulaim lumshe idanuwansa ya yi yana saurararta
Har ta É—isa aya bai ce mata komai ba.

Naila jin Sulaim ya yi shiru kamar ma baya kallonta sai ta fashe da kuka tana mitar ita fa ba wai aminta tayi da Simbi ba, kawai mutunci suke yi, a matsayinsu na Æ´an Yanki É—aya.

Sulaim dai bai ce mata komai ba, har sai da ta haƙura tayi shiru dan kanta sannan ya ce;

"Me kikeso Nailaa bayan alƙawarin da kika ɗaukarmin?"

Da sauri Naila ta share hawayenta ta ce; "ka barni muyi zumunci Ni da Simbi"

Sulaim idonsa da sukayi ɗanyi jaa ya buɗe saɓanin daa da suke lumshe ya na kallon fuskarta, sun kai wajen minti ɗaya haka yana kallonta tana kallonsa sannan a hankali ya furta;
"Na barki Naila shikenan?"

Kai Naila ta É—aga, alamar eh tana murmushi, "kamar sunana na ji ya kira" ta tambayi kanta a cikin zuciyarta.

Maganarsa ce ta cire mata kwakwanton da take yi a cikin zuciyarta;
"Na gaji Naila da safe zan kira ki, anan Kahala yanzu dare ya raba"

Da rawar murya Naila ta ce.
"Maiyasa yau ka kiran sunana baka ce Sa'aadati ba, ko har yanzu fushi kake yi da ni"

Sai da Sulaim ya É—anyi murmushi sannan ya ce;
"Na tambayeki me kike so bayan alƙawarin da kika ɗaukarmin, kika ce na barki da Simbi. kuma na ce na barki, karki ƙarawa kanki damuwa, Allah Ya tashemu lafiya"

Da wani irin zare idanuwa kamar zasu faɗo ƙasa Naila take tambayarsa "ka barni? ka barni fa ka ce? to ai ban fahimci ka barni ba, kayimin bayani"

Babu bayanin komai Sulaim ya datse kiransa.

A ɗimauce Naila tafara kira layukan wayarsa amma yaƙi ɗagawa.

Batasan sau adadi nawa ba ta kira layukan wayarsa a wannan dare ba amma sam bai É—aga ba.
Da dai ta fuskanci Dagaske bazai É—aga kiranta ba Kuka ta rushe da shi tana dafe kanta.

A ɓangaren Kaka ƙarfin kukan Naila ne ya tasheta daga barcin da bata jima da farasa ba.
A ɗimauce ta nufo ɗakin, babu irin bugun da batayi ba amma Naila taƙi buɗewa.

Kaka masifa da mitar maza ta kashe kanta ta fara yi tana cigaba da bugun ƙofar. Amma Naila tayi biris da ita.

Har dare ya raba Kaka bata koma ɗakinta ba tana tsaye jikin ƙofar Naila tana lallashinta ta ɓude tunda tayi masifa da zage-zage bata buɗe mata ba.

Gajiya Kaka tayi da tsayuwa da zama ta koma ÆŠakinta, haushin kafiyar Naila na damun zuciyarta

★har washe gari da Safe Naila ƙin buɗe ƙofarta tayi, duk naci da magiyar da Kaka tayi mata bata buɗe ba, wannan dalilin yasa ta nufi Sashensu Simbi.

SIMBI
A ɓangaren Simbi daƙyar Umminsu ta kwantar mata da hankalin ta nutsu, amma gargaɗeta da ta kiyaye, kuma duk inda taga mutumin ta riƙe addu'a a bakinta karta ƙara kulashi ko da yayi mata magana.

Har dare ya yi Simbi bata wani saki jikinta ba. Rashin sukuni da yadda ta dawo shiru-shiru ne yasa Barirah bayan ta dawo daga wajen aiki ta ce tazo ta rakata su je Siyayya.

Ba don hankalin Ummu Malik ya kwantaba ta barsu suka fita.

A motar Barirah suka bar Gidan. Wajan Siyayyar kayan shafe-shafe suka shiga, Barirah tana gaba Simbi tana binta a baya.

Kamar ance Simbi ta waiwaya gefen hagunta ta hango Dee cikin shigar wasu kayan daban ba irin wanda ta gansa da shi da safe ba.

Ya yi matuƙar yimata kyau a ido, tuni addu'ar da Mahaifiyarta ta ce tayi idan ta gansa ya bar kanta, burinta hankalinsa yayo kanta ta bashi labarin kuɗinfa da ya bata aljanun gidansu da batasan da su ba sun ɗauke. Tana so kuma ta tambayesa maiyasa bai kirataba, ta manta tsarin data saka wayarta na idan bata da lambar mutum ko ya kira ba zai zo ba.

Maimakon Simbi tabi bayan Barirah sai tasha kwanar inda ta hango Dee.
Tana kuwa matsawa tayi sa'a Dee ya hangota.

A ɓangaren Dee da murmushi ya nufo Simbi da wani salon tafiya da zai ƙara siye zuciyarta.

Da Muryarsa mai daÉ—in daya siye zuciyarta ya ce;
"Barka da dare Gimbiyata Simbi"

Ido Simbi ta lumshe, tana ƙanƙame wayar hannunta saboda daɗi.

Murmushi Dee ya yi, kafin ya ƙara ce wa; "idan babu damuwa zamu iya tattaunawa daga waje" ya ƙarasa faɗa yana giftata ya nufi hanyar fita.

KafaÉ—unta Simbi ta É—age dukka biyu tana juya idanuwanta kafin tabi bayansa.

Tsayuwarsa Dee ya gyara lokacin da Simbi ta ƙaraso gefensa. Sai da yayi gyaran murya Sannan ya ce;
"Wai wanene ya kafa Unguwarku, kyansa ya birgeni."
Shiru Simbi tayi kamar bata wajen.
Dee kansa ya É—an dafe ya ce;

" Ohh kiyi haƙuri naga kamar tamabayar bata yi miki daɗi ba, kyan Unguwar ne yasa na tambaya, amma kamar yanzu fuskarki tafi annuri Gimbiyata, da safe da muka haɗu kamar akwai abinda yake damunki ko kuma akwai wacce take son yi miki shishigi a cikin rayuwarki, kinsan ni ina da ƙwaƙwalwar saurin nazartar mutane, ko zan iya sanin wacece wannan, na taimakamiki da shawara ko wani abun?"

Simbi, Dee ya sosa mata inda yake yimata ƙaiƙaiya, duk da tana ganin kamar bai dace su tattauna irin wannan matsalar daga haɗuwarsu ba, sai dai a cikin zuciyarta ji takeyi kamar ana ingizata.

Zata yi magana kenan suka hango Barirah ta fito tana rarraba ido alamun ita take nema.

Dasauri Dee ya kamo hannun Simbi ya dunƙulamata wani ɗan kulli, sannan a gurguje ya ce

"Ko wacece ki sa mata a abinci zata koma inda ta fito ta bar muku Gidanku, amma baki faÉ—amin sunan wanda ya kafa Unguwarku ba"

Da harshenta da ya yi mata nauyi ta buɗe baki zata bashi amsa Barirah data hangota ta ƙwala kiran Sunanta.

Da saurin da ya bawa Simbi mamaki Dee ya shige tsakankanin Motocin dake wajen.

Ƙullin da ya damƙa mata ta riƙe da kyau.

Kafin Barirah ta ƙaraso tuni ta saita nutsuwar haɗe da zura ƙullin da Dee ya bata a ciki jaka.

A É“angaren Ummu Malik, bayan fitarsu Simbi, baifi da mintuna goma ba, Malik ya kirata kar a bari kowa ya fita, ya kira Securities su datse Dhahab ba shiga ba fita.

Da fargaba take sanar da shi ai su Simbi da Barirah ba su jima da Fita ba, ihun salatin daya tashi hankalinta Malik ya saki, kafin ya ce takirasu kuma idan sun dawo babu shiga babu fita.

Ko da su Simbi suka dawo Simbi bata gayawa Mahaifiyarta ta haÉ—u da Dee ba.

Ummu Malik Kashedin da Malik ya ce ayi musu ta sanar musu jikinta a sanyaye.

Bayan Barirah da shiga É—akinta bakinta ta turo aganinta kawai izzar Malik É—in ne ya motsa banda haka, maiyasa zai ce ba shiga ba fita Sai kace ana wani tashin hankali, ko don kawai an É—aukewa Simbi kuÉ—i shine zasu takurawa Mutane.

Ita ma Simbi É—akinta shige ta kullo kanta ba tare da ta naimi jin ba'asin hukuncin Malik ba.

Ƙullin da Dee ya bata ta fito da shi tana kallo, zuciyarta na kitsa mata kawai ta sawa Naila ta tattara ta koma Yankin Tudu, Sulaim ya auri Barirah ko ya samo wata can daban, sai dai tayaya zata sa bayan Mahaifiyarta ta sanar da su ba fita ba shiga? Ɗakyar ɓarawon barci ya saceta.

★washe gari suna cikin yin kari Kaka ta shigo, tunda batasan sharaɗin da Malik ya zana ba, kuma Securities basu hanata zuwa ba.

Da magiya Kaka take yiwa Ummu Malik bayanin tanason Simbi ta biyota su lallaɓa Naila ta buɗe ƙofarta tun jiya ta kulle kanta taƙi fitowa.

A zuciyar Simbi Allah-Allah takeyi Mahaifiyarta ta amince.

Barirah kuwa tashi tayi tabar wajen tana taɓe baki.

Sai da Ummu Malik ta É—an nisa sannan tace Simbi ta É—auko Mayafinta su je, amma karta daÉ—e ta dawo da wuri.

Jikin Simbi har ɗan rawa yakeyi tabi bayan Kaka bayan ta soƙe ƙullin maganinta a ƙugu.

NAILA;
Kwana tayi kiran Sulaim, amma bai ɗaga ba, bayan Sallar Asubahi da ta ƙara kira sai ta ji wayar a kashe.

Tabbacin Kaka bazata tankawa matsalarta ba ne yasa tayi biris da ita taƙi buɗe mata ƙofa.

Bayan sallar Asuba da Kaka ta dawo tana ƙwanƙwasawa barci mai nauyi ya fara ɗaukarta .

Ko da ta farka ta fito bata ji motsin Kaka ba, bata damu ba.
Kitchen ta wuce ta haÉ—a É—an shayin da zata iyasha.

Tana cikin shan shayin Kaka da Simbi suka shigo.

Sama-sama Naila ta amsa gaisuwarsu, tana cigaba da shan shayin dayake ƙona mata baki.

Ƙin tashi Simbi tayi ta koma Sashensu.
Guri ta naima kusa da Naila t ta zauna tana janta da hirar da ba wani amsar kirki take samu ba.

Kaka dama ÆŠakinta ta wuce, bata zauna ba.

Naila surutun Simbi ne yake hawa kanta, sam bata son hayaniya tafison ta zauna shiru ko zata samo mafitar bawa Sulaim haƙuri.

Naila tunanin tayiwa Ummi Aysha wani abu mai daÉ—i ta kai mata ne yazo zuciyarta, daganan sai ta sanar da ita abinda yake faruwa ko zata taimaka mata.

Da ƙwarin gwiwarta ta miƙe ta nufi Kitchen, Simbi tayi wuf ta rufamata baya.

Simbi tana maƙale a gefen Naila tana yimata hira, Nailan tana amsa mata sama-sama tare da cigaba da abinda take yi.

Da salon dakar ciki Simbi ta ce;
"Me kike haÉ—awa haka da safenan, ayi dani nima zanci"
"To " kawai Naila ta ce ta cigaba da aikinta.

Naila ji tayi kamar wayarta da ta bari a parlor yana ƙara, da sauri ta saki aikin tana addu'ar Allah Ya sa Sulaim ne.

Bayan fitar Naila ta wannan damar Simbi tayi amfani, kafin ta biyo bayan Naila tana faÉ—in;
"Yau na ga bakyason kulani, bari na koma Sashenmu sai anjima"

Haushinta da Naila take ji yasa ko gefenta bata kalla ba ta cigaba da amsa kiran Abokiyar karatunta.

Bayan Naila ta koma Madafi ta gama aikinta, wanka tayi ta shirya, har É—aki tabi Kaka ta sanar da ita zata je É“angaren Ummi Aysha ta dawo.

Addu'ar a dawo lafiya Kaka tayimata.

Yadda Naila ta samu sashen Ummi Aysha anata hidima ne ya sanyaya jikinta, bayan ta miƙa mata Snacks ɗin da ta nannaɗe da foil paper sai ta kasa faɗar abinda ya kawota.

Ummi Aysha, da farin ciki ta karɓi kyautar Naila, tana ɗan janta da hira. Amma bata yimata hirar Sulaim ko abinda ya dangacesa ba har Naila ta bar Sashen.

UMMI AYSHA Batasan akwai matsala a tsakanin Naila da Sulaim ba, don haka ta ajjiye abinda Naila ta kowamata domin nunawa Sulaim idan ya iso.

SULAIM
A É“angaren Sulaim duk kiran da Naila takeyi baisan tana yi ba, saboda wayar a Silent take, batun barinta da ya ce yayi, ya faÉ—a ne, don ta dawo hankalinta saboda ya lura son dayake mata na naiman kawo rashin girmamawa a tsakaninsu.

★Da Asubahi aka sanar da shi ansamu Malamin daya ce a naimomai, kai tsaye ya haɗa Malamin da Malik. Bayan gama wayarsa da Malik ya ankara da tarin kiran da Naila tayi mai, maimakon ya amsa kiranta data cigaba da kira da Asubahi sai ya kashe wayar gaba ɗaya.

Kamar yadda ya tsara bayan gari ya yi haske ya kira Mahaifiyarsa ya sanar da ita zuwansa.

Ummi Aysha tayi mamakin zuwansa a irin wannan lokacin tun da bai jima da tafiya ba, sai da yayi mata bayanin uzurine zai kowasa.
Da wasa da dariya take tsokanarsa ko dai Naila zai zo gani?
Sulaim murmushi kawai ya yi bai ce komai ba har sukayi sallama.

Shirye-shiryen tarbarsa Naila ta samu anayi a É“angaren Ummi Aysha.

Kafin Sulaim ya isa Dhahab, Malik da Mallamin da daya je ya É—auko sun rigasa isowa.

A É“angaren Malik bayan sun iso Dhahab da Mallam, a sashensa yayiwa Mallam masauki.
Mallamin ko hutawa baiyi ba ya ce akirawomasa Simbi.

Ko da Malik ya je, Simbi ta kulle kanta a ɗaki da sunan tana barci, da Malik ya dawo ya gayawa Mallam Simbi tana barci cewa yayi su tasheta, idan taƙi tashi su kirasa..

Lokacin da Sulaim ya iso ƙasar Abyad a sirrince aka ɗaukosa zuwa Dhahab babu chunkoson jami'an tsaro da yawan Motoci.

Ɓangaren Ummi Aysha ya sauka kamar waccen karon.

Ummi Aysha bakinta ya kasa rufuwa sai fara'a takeyi, tana jansa a jiki.

Abincin data shiryamai da kanta ta gabatarmai har da Snacks É—in da Naila ta kowamata masu kyan gani a ido ta jera a gefe.

Maimakon ya ɗaibi abinda yake gabansa, sai ya kai hannunsa kan Snacks ɗin da sukayi matuƙar burgesa.

Ummi Aysha dariyarta ta ƙunshe tana jiran yakai bakinsa sannan tayimai tsiyar wato Naila ta gayamasa ta kawo mata Snacks shine zai ajjiye nata girkin ya fara dana Naila.

Ya na kaiwa baki ya gutsira ya tauna ya haÉ—iye.

Dariyar Ummi Aysha ta saki tana yi mai tsiya ba tare da ta lura da sauyinsa ba.

A hankali ya jingine bayansa da kujerar dayake kai, Fuskarsa ya sunkuyar ƙasa, kafin wuyar ya karye kamar wanda barci ya kwashe a zaune.

Dariyar Ummi Aysha ne ya ɗauke lokaci ɗaya, ta miƙe ta nufosa tana faɗin;

"lafiyarka Sulaim menene haka ka karya wuya, kayimin magana mana!"